AF268: 38r

249 ʿIşq sırr‑i ḥaqquñ usṭurlābıdur
Vech‑i dil‑ber ʿāşıquñ miḥrābıdur

250 Ger mecāzī ger ḥaqīqī ʿışq‑i yār
Reh‑ber olur ʿāşıqı yola qoyar

251 ʿIşquñ ās̱ārı‑durur bunlar qamu
Ẕātı ʿışquñ şerḥ olunmaz ey ʿamū

252 Dil‑ile olur qamu rūşen beyān
Andan aẓhar olur ̮ʿışq‑i bī‑zebān

253 Çünki kātib mebḥas̱‑i ʿışqa gelür
Ḫāme taḥrīrinde iki şaqq olur

254 Şerḥ‑i ʿışq ėtmekde ʿaql‑i ḫurde‑dān
Pāy der‑gil bir ḫara beñzer hemān

255 Qīl ü qāl‑ile bilinmez ẕāt‑i ʿışq
Ẕevq‑i vicdānī‑durur leẕẕāt‑i ʿışq

256 Āfitāb oldı delīl‑i āfitāb
Būy‑i ḫoşdur şāhid‑i müşk ü gülāb

257 Sāye gerçi nūrdan vėrür nişān
Şemsden fāyiż olur envār‑i cān

258 Sāyeden ḫᵛāb u tekāsüldür es̱er
Ṭalʿat‑i ḫūrşīd inşaqqü l‑qamer

259 Gerçi ḫūrşīd oldı bir emr‑i ʿacīb
Ferd‑i kāmil reh‑rev‑i bālā vü şīb

260 Ẕihn anı eyler taṣavvur bī‑nizāʿ
Fikr ėder anuñ mis̱ālin iḫtirāʿ

261 Līk şems‑i ẕāt‑i bī‑mis̱l ü naẓīr
Olımaz bir vechle ṣūret‑peẕīr

262 Ne vücūd [u] ẕihnī vü ne ḫāricī
Bilmez anı bir qılı qırq yarıcı

263 Ẕihne gelmez qalbe ṣıġmaz ẕāt‑i şems
Yaʿnĭ ẕāt‑i ḫālıq‑i iṣbāḥ u ems

264 Şems añıldı çünki ṣāḥib‑mes̱nevī
Āfitāb‑i nüh‑qubāb‑i maʿnevī

265 Şems‑i Tebrīzīden açdı qīl ü qāl
Ẕevq ü ḥiṣṣe almaġ‑içün ehl‑i ḥāl

266 Sırr‑i Şemseddīn olıcaq der‑miyān
Şerm ėder ḫurşīd özin eyler nihān

267 Çünki yād ėtdüñ o yāruñ nāmını
Vācib oldı ẕikr ėdem inʿāmını

268 Şükr‑i niʿmet artuq eyler niʿmeti
Şükrden ġāfil olandur nekbeti

269 Ṭutdı cānum şevq eliyle dāmenüm
Döndi Yaʿqūba hemān ḥālüm benüm